ALLAHWAKBAR!

Asmi d-testeqsa lehna nerr-tt si lḥaṛa
Nenna-yas aqel-aγ labas!
Neṛwa lxiṛ d lbaraka, ur γ-ixuṣ wara
Ad ikkes ay nettu yiw wass;
Tezzit wallen γ lqebla
Am akken i s-inna ad iwet ubeḥri n tissas
Allahwakbaṛ allah!

Taɛṛabt d awal n ṛebbi, dges tamusni
Mači am tigad nniḍen
Fell-as ma tewḍeḍ s ifri xas grireb γli
D Muḥemd a k-id-iselken;
Ḥader ad ak-d-ildi yiẓri qqar kan : "Sidi"
I widan k-izuzunan!
Allahwakbaṛ allah!

Ḥader ad takwiḍ si tnafa!
Aqel-ik di lxelwa, asebsi n lkif d arfiq-ik
Ttmuqul kan lqebla d Lkeɛba crifa!
D nitni i d tafat-ik.
Akket aqerru-k di lqaɛa ur semḥas ara
Sel kan i sidi ccix-ik!
Allahwakbaṛ allah!

Tizlit n MEΣTUB Lwennas (1983)

LΣEMR-IW

Xas iǧa ljehd iγallen-iw
Mazal ṣṣut-iw ad ibbeɛzeq,
A' s-d-slen.
Nnan iqqers-d udrar,
Kečin ur teḥḍireḍ ara;
Bnadem i bnadem iqqar
D amenzu n Yennayer ass-a!
Teǧujeg tmurt amm lefnar,
Di Tizi terṣa rreḥba,
Di Bgayet itterḍeq uɛbaṛ,
Rẓan azaglu n tlufa.
A lɛemr-iw! A lɛemr-iw!
D idurar ay d lɛemr-iw.
Annaγ mennaγ w' iḥeḍren
Xerṣum ad ẓẓgeγ awal,
Lemḥayen nn' i d-i-yuγen
Uγalent-iyi d raṣelmal,
Imi Leqbayel dduklen,
Yir leɛyub a ten-sefḍen
Ulayγer tuγzi n wawal.
Tamaziγt d lsas-nnsen,
D aẓar n tudert-nnsen,
D lweqt ad ferzen lecγwal.
Xas ičeḥ wul-iw meɛḍur
Gar-awen im' ur ḥḍireγ ara,
Aṭas i iɛebba ičuṛ
Ẓẓay, ur izmir ara,
Ibγ' ad as-d-slen leɛṛuṛ,
Widen a ičen ahicuṛ
M' akka tizdag nneɛma,
Win s-innan awḥid meḥqur
Ad yas ad izegged lehḍur
M' akk' a-γ-d-iberz ṣṣeḥḥa.
Yir lehḍur seffḍen ddnub,
I d-nnan imezwura,
Ulayγer teṭṭfeḍ addud
I wayen ur nesɛi lmeɛna,
Ad yuγal ad iḥlu ufud,
Ad tsellem i ugrud
Ad ittγenni f timmuzγa:
Ayen i γ-d-iǧa Dda Lmulud
Iban-d amm rrɛud,
Wiss ma tḥusseḍ a lfahem i tmeqwa!?

Tizlit n MEΣTUB Lwennas

TILELLI

Tuaγleḍ-iyi d am yiṭij
Fell-i ittfeǧiǧ, tegnaw m' a tt-iǧ usigna
Isem-im γuri ur iffir irkeb-iyi lḥir
M' akem-id-ddreγ deg isefra.

Tuγaleḍ-iyi d am udfel deg yiḍ m' ar idel
Iberdan di mkul tama.
Fell-am i xlant leḥwari mmuten irkwelli,
Ilaq ad tnaḍiḍ tura.

Tuγaleḍ-iyi d am dheb ul mi kem-iqelleb
S yissem ar a yaf lehna.
Tifeḍ aggur tziri, a netteddu ḥafi;
Tseɛerqeḍ-aγ lǧerra.

Tuγaleḍ-iyi d am ddkir ijebd-iyi lḥir,
tettekkseḍ i umeḥbus lefqa,
tleḥḥuḍ γef kul tamurt tettakeḍ-as lqut
I ugujil ur nesɛ' ara.
Tuγaleḍ-iyi d targit, walaγ ddunit
D wayen fi nettnaγ tura.
W’ immuten wayeḍ ad ikker,
Tafat ad teḍher,
I ṭlam a tekkes nnuba!

Tuγaleḍ-iyi d abruri ikkaten fell-i
Am terṣast g uglim terṣa;

Tuγaleḍ-iyi d am aḍu ar a iγumman agu,
Tafukt ad tḍil γ lḥaṛa.
Isem-im, isem-im ass-a a t-id-nini,
Yides a nili a nḥareb γef tirrugza;
A neḍleb a γ-trefqeḍ, yid-neγ a tḥeḍreḍ,
Azul yissem a Tilelli!

Tizlit n MEΣTUB Lwennas